| تبليغات | X |
"شعر وارلیغین ائویدیر" کیتابینین ایکینجی جیلدی یولدادیر
"شعر وارلیغین ائویدیر" کیتابینا گؤستریلن دیققتین آردینجا دئمک اولار کی، کیتاب بیر چوخ ساتیش اوجاقلاریندا ساتیلیب قورتارمیشدی. بو مسئله کیتابین ایکینجی چاپینی ضروری ائتمیشدی. هابئله تالیفی سونا چاتمیش کیتابین ایکینجی جیلدی، نشر ایجازهسی گؤزلهییر. کیتابین ایکینجی جیلدی تخمینن ایکی یوز صحیفهده حاضیرلانمیش، کتابین بیرینجی جیلدینده ایسه کؤکلو دییشیکلیکلر آپاریلمیشدی. دئمک کیتاب تام یئنیدن یازیلمیشدی. سونرا بو ایکی جیلدین بیر یئرده، یعنی 400 صحیفهلیک بیر حجمده چاپ اولماغی پلانلاشدیریلمیشدی. دئییلنلره گؤره کیتابین اوچونجو جیلدی ده حاضیرلانماقدادیر. بو جیلد بوتونلوکله گونئی شعرینین گؤزهللیک فلسفهسینه عایددیر. "ایواز طاها"نین بو کتابی نین بیرینجی و ایکینجی جیلدینین ایچلییی [فهرستی]:
ـ نییه گونئیده شعر وار، نثر یوخدور؟
ـ شعر دیلی ایله فلسفه و بیلیم دیلی هانسی باخیمدان بیربیریندن سئچیلیر؟
ـ شعر نییه داها چوخ توتالیتئر توپلوملاردا چیچکلهنیر؟
ـ شعر اؤزو اؤزلویونده آماجمیدیر، یوخسا اؤزوندن خاریج بیر آماجا قوللوق ائدیر؟
ـ شعر لذت یاراتمالی، یوخسا فایدا یئتیرمهلیدیر؟
ـ قادین شعریمیزین دورومو نئجهدیر و اونون فئمینیزمله هانسی باغلیلیغی واردیر؟
ـ اؤزگون [اصیل] اینجهصنعتین پاپولیار اینجهصنعتله هانسی ایلگیلری واردیر: شعر و ایلنجه.
ـ یازیچینین اؤلومو و اوخوجونون دؤنمی.
ـ بدیعی اثرده قورولوشچولوق [ساختارگرایی] نه دئمکدیر؟
ـ اینجهصنعت، ائگزیستانسیالیزم و قورولوشچولوق.
ـ شعر و دوشونجه: هولدئرلین، والئری، افلاتون و هایدگئر.
ـ شعریمیزده بیچیم [فرم] و مضمون چاتیشمامازلیغی.
ـ شعرله ایدئولوگییا هاردا اوزلاشیر، هاردا چارپازلاشیرلار؟
ـ نیچه، تئودور آدورنو، هانس گادامئر، ماکس هورکهایمئر، مارتین هایدگئر، پول والئری، چئرنیشئوسکی، ژانپول سارتر، پول ریکور، میشئل فوکو، رولان بارت، میخایل باختین، توماسو مارینئتتی، ائزرا پاوند، اسلاووی ژیژئک و... بدیعی اثر و یارادیجی بارهسینده نئجه دوشونورلر؟
ـ احمد جاواد، عیمادالدین نسیمی، محمد فضولی، هولدئرلین، ولادیمیر مایاکوفسکی، لویی آراگون، ناظیم حئکمت، احمد شاملو، جمال ثریا، کامال طاهیر، اورخان ولی، سیویا پلات، ویلیام ووردزوورث، نازک الملائکه، تئد هیوز، علی صمید کور، مولانا ایدریس و باشقا شاعیرلردن شعرلر، و یا شعرلر پارچاسی اساسیندا چؤزوملهمهلر [آنالیزلر].
گؤزلهنیلمز پروبلئملر یارانماسا کیتاب گلن اوچ دؤرد آی عرضینده ایشیق اوزو گؤرهجک.