نئجه یازاق کیتابیندان اؤرنک‌لر

گؤره سن آشاغيداکی جوٍمله لرين هانسی داها دوٍزگون دور:

ـ آياغينی چاريقدا يئرلشديريب.
ـآياغينی چاريغا يئرلشديريب.

باشقا ديللرين ائتکیسی ايله، بيرينجی جوٍمله يايغين اوْلسا دا ايکينجی جوٍمله ديليميزين قايدالارينا داها اويغون دور.
“سن دوٍنيانی گؤروٍرسن می، داغ بؤيوٍکلوکده کيشينی جيريق گالوْشا يئرلشديريب.” (س. رحيم اوف)

«اوْنا رعايت ائتمک» و يا «اوْنو رعايت ائتمک» کيمی عيبارت‌لرين دوٍزگون يازيليشينی يوخاريداکی قايدايا داياناراق دقيق لشديره بيله ريک. بيزده «اوْنو رعايت ائتمک» ايشله نير، رسمی ديلده ايسه «اوْنا رعايت ائتمک». منجه بيزده کی واريانت عئينی ايله فارسجادان آلينمادير، حالبوکی کؤکوٍنه باخاندا «اوْنا رعايت ائتمک» داها دوْغرو نظره گلیر. چوٍنکو عربجه «رَعَاهِ» جوٍمله سینين قارشيليغی «اونا رعايت ائتدی»دير. ائله جه ده، «آياغينی چاريغا يئرلشديرمک» دوٍزگوندور. بونلارا اساسَا، «يئر اوٍزونده» دئييل، «يئر اوٍزونه» سئوينج يايماق اوْلار. توْفيق بايرام «تزه ايل دوٍشونجه‌لری» باشليقلی شعرينده دئيير:

گليرسن
موٍژده لر گلير سسينده؛
بوٍتون يئر اوٍزونه سئوينج ياييرسان؛
سن کؤهنه ايللرين ايلک جرگه سينده؛
تزه عسکر کيمی آدديملاييرسان.